កំពង់ស្ពឺ៖ រដ្ឋបាលខេត្តកំពង់ស្ពឺនឹងរៀបចំពិធីបុណ្យអុំទូក អកអំបុក បណ្តែតប្រទីប និងសំពះព្រះខែ នៅថ្ងៃទី១៨ និងទី១៩ ខែវិច្ឆិកា ឆ្នាំ២០២៣ ដោយមានការប្រណាំងទូកនៅតាមបណ្តោយដងស្ទឹងព្រែកត្នោត ព្រមទាំងមានការបាញ់កំាជ្រួច និងកម្មវិធីសិល្បៈសម្តែងនៅមុខសួនច្បារសម្តេចព្រះសង្ឃរាជ ជួន ណាត។

រដ្ឋបាលខេត្តកំពង់ស្ពឺ បានអំពាវនាវអ្នកដែលមានគ្រប់ក្រុង ស្រុក គ្រប់មន្ទីរ អង្គភាពនានាជុំវិញខេត្ត និងគ្រឹះស្ថានឯកជនទូទៅដែលមានបំណងចូលរួមក្នុងការប្រណាំងទូកនៅខេត្តកំពង់ស្ពឺអាចមកដាក់ពាក្យូចូលរួមប្រកួតនៅគណៈកម្មការខេត្តកំពង់ស្ពឺ (មន្ទីរអប់រំ យុវជន និងកីឡាខេត្តកំពង់ស្ពឺ) ឱ្យបានមុនថ្ងៃទី១៥ ខែវិច្ឆិកា ឆ្នាំ២០២៣។

រដ្ឋបាលខេត្តកំពង់ស្ពឺបានណែនាំដល់ស្នងការដ្ឋាននគរបាលខេត្ត បញ្ជាការដ្ឋានកងរាជអាវុធហត្ថខេត្តកំពង់ស្ពឺ បញ្ជាការដ្ឋានតំបន់ប្រតិបត្តិការសឹងរកកំពង់ស្ពឺ ត្រូវណែនាំដល់អង្គភាពក្រោមឱវាទឱ្យសហការការពាររក្សាសន្តិសុខរបៀបរៀបរយ សណ្តាប់ធ្នាប់សង្គម សម្រួលចរាចរណ៍ បង្កលក្ខណៈ និងធានាសុវត្ថិភាពសប្បាយរីករាយជូនពលរដ្ឋ។

ជាមួយគ្នានេះ រដ្ឋបាលខេត្តបានណែនាំឱ្យក្រុមហ៊ុន និងសប្បុរសជនដែលមានបំណងចង់ចូលរួមឧបត្ថម្ភជាសម្ភារ ថវិកា ដើម្បីឱ្យដំណើរការរៀបចំពិធីបុណ្យនេះ និងជូនរង្វាន់ដល់កីឡាករ កីឡាការិនីអុំទូក ក្នុងស្មារតីចូលរួមចំណែកថែរក្សានូវវប្បធម៌ប្រពៃណីជាតិនេះ អាចទាក់ទងផ្ទាល់នៅសាលាខេត្តកំពង់ស្ពឺ៕